بصراحة مفيش حد بيفهم في العربيات
إلا لما بيقول "الألمان" مبدعين! بس في جملة لفتت إنتباهي جداً
" الألمان ما بيطلعوش عربية وحشة!"
بس بعيداً عن العربيات وإن ممكن يكون في عربية ألماني وحشة ..بس في حاجة بتحصل خد بالك منها!
بدأت ألاحظ إن بعد فترة المُصنع هو اللي بيعلي قيمة المنتج!
يعني يبقى ماركة جديدة أو منتج جديد بس تلاقي البياع بيقولك "بس خد بالك يا باشا ده ياباني!"
وإنت بناء على ثقتك في المُصنع بتحترم المنتج وبتثق إنه هيكون كويس!
ولله المثل الأعلى.
أنت من صنع الله سبحانه وتعالى
فإزاي ما تبقاش شايف قيمة لنفسك؟!
من أكثر مشاكل العصر إنتشاراً "low self-esteem” التقدير المنخفض للذات
وده ليه أسباب كتير جداً علمية
ولكن بشوف إن جزء منه بيخبط جواك لما بتحس إنك “worthless” مالكش قيمة!
إنك أي كلام وماعندكش حاجة تقدمها!
يا راجل يا طيب يعني واثق في صنع الألمان وإنهم ما بيطلعوش حاجة وحشة.. وصنع الله سبحانه وتعالى هو اللي هيطلع منه حاجة وحشة؟!
طيب ليه ياعم كريم في ناس وحشة وليه في ناس زيي مش لاقيين قيمة لنفسهم والحياة مخبطة!
رأيي المتواضع يا صديقي إنك بتخلط دلوقتي بين جودة السيارة وجودة السائق!
ربنا خلق لك عقل وقدرات وإمكانيات عظيمة
ممكن تاخدها وتلبس في حيطة أو تستغلها في سوء وممكن تؤدي بيها عمل عظيم!
فركز دايماً إن المشكلة الحقيقية مش فيك!
المشكلة في إختياراتك!
المشكلة في قراراتك!
اللي بوعي وإجتهاد ممكن تتعلم منهم وتطورهم
ولكن لو العيب فيك إنت نفسك!
الموضوع أصعب بكتير
ثق في نفسك
ثق في صنع الله
جدد إختياراتك!
ليست هناك تعليقات:
إرسال تعليق