هو أنا ليه مبتقدمش في شغلي؟ ليه لو في ترقيات أو مشاريع كبيرة الشركة بتاعتي دخلاها مبكونش من ضمن الفريق فيها؟ ليه بحس دايما إن مدرييني وزملائي مش بيثقوا فيا؟ هو أنا بعمل إيه غلط؟ الحقيقة إن أسئلتك دي هي مربط الفرس وكونك بتدور على الشيء الغلط اللي ممكن تكون بتعمله ومانعك من إنك تتقدم فأنت هنا على الطريق الصحيح.
إنك تكون مصدر ثقة في شغلك ده شيء مش سهل ابدا، إنت مش شغال لوحدك إنت بتتعامل مع رؤسائك أو زملائك اللي ممكن يكونوا أعلى منك مرتبة أو زيك أو حتى أقل منك، وإنك تكون لك مصداقية وسطهم ده شيء صعب ومش بتكتسبه بسهولة، ولو حاسس إنك مش بتتمتع بالثقة والمصداقية دي وعرفت الغلط فين وحاولت تصححه فأنت هنا هتكون ماشي صح.
في عادات كتير أوي سيئة ممكن إنت كموظف تكون بتعملها غلط وحتى ممكن تكون مش واخد بالك منها بس هي للأسف بتأثر عليك وعلى مكانتك وسط زملائك وفي شغلك عامة، واحنا في البوست ده هنقولك إيه العادات السيئة دي لعلك تصلحها وتحاول تتفادى إنك تعملها:
1.ؤكمتبقاش وقح في تعاملك مع الآخرين أو قليل الذوق: خليك دايما فاهم إن طريقة تعاملك مع اللي حواليك هي اللي هترفع من مكانتك أو تدمرها، وأكيد في أي شغل ممكن تيجي لحظة أعصابك تفلت منك بس دايما حاول تكون هادي وودود على قد ما تقدر لأن لو الناس خدت انطباع إنك شخص وقح في تعاملاتك فإحنا مش محتاجين نقولك ده هيوصلك لإيه.
2. متشتكيش كتير: لو بتشتغل مع زملائك في مشروع مثلا وواحد منهم مقدمش المطلوب منه في الوقت المحدد فانتقادك له بأسلوب مهني هيكون دايما محل تقدير بالعكس متخافش إنك تعبر عن ده خالص، لكن لو شكوتك زادت عن الحد وفي كل موقف بقيت دايما تشتكي وترمي أي حاجه سلبية عاللي حواليك وإن محدش بيعمل شغله غيرك، فإنت في الحالة دي هتكون الشخص السلبي الشرير اللي الناس مش هتحب تشتغل معاه.
3. متاخدش قرارات متسرعة: لو كنت مدير أو قائد فريق فأنت اكيد قدامك فرصة إنك تاخد القرار النهائي في أي موضوع، فحاول دايما إن قرارك ميكونش متسرع وخد وقتك قبل ماتقرر خاصة لو في حاجة لسه مش متأكد منها، لإن غير كده الناس هتاخد عنك انطباع إنك مهمل ويمكن متحيز ضدهم كمان.
4. متنسبش لنفسك شيء معملتهوش: وده أسوأ شيء ممكن تعمله وممكن حتى ميكونش قاصدك، فلو إنت وزميل لك اشتغلتوا سوا على مشروع لما تيجي تقدمه للمدير بتاعك ممكن تفضل تقول كل اللي عملته وتكبر وتعظم دورك لدرجة إنك ممكن توصل لزميلك إنك مبتعترفش باللي هو عمله أصلا، وعشان تبعد نفسك عن الفكرة دي قول كل حاجة إنت وغيرك عملها وخلي كل واحد ياخد فضل كل حاجة عملها.
5. تقبل النقد: النقد المهني لك ده شيء كويس جدا هيفيدك إنك تطور نفسك وتصلح اخطائك، وإذا زميلك أو مديرك قالك على حاجة متعملتش صح أو كانت ممكن تتعمل بشكل أفضل فمتكونش دفاعي بدون مبرر، لإن دفاعك عن نفسك وخلاص مش هيظهرك غير إنك شخص غير ناضج ومش قادر يعترف بأخطائه، الأفضل إنك تسمع كويس وتتقبل النقد وترد بهدوء حتى في عز غضبك.
6. متفضلش واقف مكانك: من ضمن الحاجات اللي ممكن تعطلك في شغلك إنك تفضل واقف مكانك ومتحاولش تتعلم حاجات جديدة وتعتقد إن الدنيا حلوة زي ما هي والأمور ماشية فمفيش داعي أن اتعب نفسي، وده أكبر غلط ممكن تعمله في حق نفسك، لأنك لو اتحطيت في خانة الموظف الكسول الروتيني ففي أي لحظة هايجي حد أفضل منك هيتم الاستغناء عنك.
7. الهرجلة وعدم التنظيم: آخر حاجة ممكن حد يحب إنه يتوصف بيها إنه يكون شخص غير منظم أو أنك تكون دايما الموظف اللي بيسلم المطلوب منه في آخر لحظة وتبقى بدل ما المفروض تكون بتحضر خطة عملك، تكون بتحاول تتجنب حدوث كارثة من وراء عدم تنظيمك. وعشان تغير الفكرة دي لازم تبدأ على أي مشروع وصلك في نفس اليوم اللي بيجيلك فيه، اتأكد من إن كل المشاريع والعروض المطلوبة منك تتنفذ قبل موعد تسليمها.
إحنا مع الأسف مش هنقدر نذكر كل العادات السلبية اللي ممكن تعطلك في شغلك وتقلل من مصداقيتك وسط زملائك لكن إحنا هنحاول نقولك على طريقة تقدر تواجه بيها أي عادة سلبية حاسس إنك ممكن تكون بتعملها:
1. خد بالك من الأوقات اللي بتظهر فيها أفعالك السلبية ولاحظ إنت امتى بتعمل كده، وممكن حتى تطلب من زملائك إنهم ينبهوك لأي فعل ممكن متكونش واخد بالك منه.
2. لو عرفت امتى ممكن يخرج منك أي فعل سيئ فده هيديك فرصة إنك تستعد للمواقف دي من قبل ما تحصل، اتدرب على ردودك وخليك دايما هادي وابعد عن الانفعال والتسرع.
3. اعمل تحدي مع نفسك واعترف لنفسك في كل مرة تقوم بحاجة انت مش راضي على نفسك وانت بتعملها، ممكن تاخد وقت وانت بتحاول تغير من نفسك بس خليك دايما واثق إن ده مش هيوصلك غير لمستقبل أفضل لك.
في النهاية لازم تبقى واضح مع نفسك لو لقيت إنك مش عارف تتقدم في شغلك أو تبقى في مكانة أحسن وعلاقاتك سيئة مع اللي حواليك فلازم تراجع نفسك أول حاجة، متقنعش نفسك إنك مضطهد وكل الناس ضدك، بالعكس حاول تشوف أخطائك ايه وصححها. وإحنا صغيرين اتعلمنا جملة بنقولها لغاية دلوقتي إن الإعتراف بالحق فضيلة ولازم تزود عليها كمان إن الاعتراف بالخطأ فضيلة برده.
ليست هناك تعليقات:
إرسال تعليق