النهاردة ١٠ أكتوبر اليوم العالمي للصحة النفسية.. رغم إن أغلبنا عندهم مشاكل نفسية بإختلاف تدرجاتها وأسبابها ورغم أهمية المرض النفسي بس برضه لسه أغلبنا بيعتبروا المرواح لطبيب نفسي عيب أو حاجة تنتقص من كرامة وعقل الشخص!.. خوف الناس إنهم ياخدوا خطوة الكشف عند طبيب نفسي سببها يا إما غلو سعر الكشف يا إما الخجل من الحكي يا إما عدم الثقة إنه هيلاقي حل عند غيره!.. بحسب إحصائية منظمة الصحة العالمية عندنا ٨٠٠ ألف واحد فى العالم بينتحروا فى السنة.. يعني كل ٤٠ ثانية فيه واحد بيقرر ينهي حياته.. والسبب؟.. واحد من ٣ أسباب: يا إما مش لاقي حد يسمعه.. يا إما بسبب صدمة قاسية مفاجأة مر بيها.. يا إما إكتئاب تراكمي إتكون على مراحل.. الموضوع ملوش علاقة بقلة إيمان أو ضعف أخلاق أو هشاشة قلب.. المرض النفسي زيه زي أى مرض تاني ممكن يتلحق لو تم التعامل معاه صح وبدون تهاون.. وممكن لو إتطنش يجيب آثار أقلها الإكتئاب.. لو أجر الطبيب غالي فيه مستشفيات حكومية بتتيح العلاج والكشف النفسي بأسعار رمزية.. فيه كمان موقع إسمه "شيزلونج" فيه مجموعة أطباء نفسيين أون لاين وكل واحد له تقييمه وسعره وإنت بتختار ما بينهم حسب اللى تختاره فيهم ويناسب إمكانياتك وبتختار تتكلم معاه شات كتابة ولا صوت ولا فيديو.. ولو كل ده غير متاح بالنسبالك برضه؟.. ماتبقاش لوحدك، وماتسيبش اللى يهموك لوحدهم.. ماتكتمش جواك وإتكلم، وخلّى عندك إستعداد تسمع لما حد ييجي يرمي فى حجرك تركة الحكي اللى طابقة فوق روحه.. رجل الأعمال والباحث " ديفيد بيرنز" بيقول: (الإكتئاب أسوأ من الإصابة بالسرطان، مريض السرطان يحيطه كل من حوله بالمحبة؛ المكتئب لا).
ليست هناك تعليقات:
إرسال تعليق