النهاردة 11 أكتوبر اليوم العالمى لـ "البنت".. كل بنى آدم خلقه ربنا بيكون فى حياته "إنسانة" بيتلخص فيها بالنسباله الكون!.. بالنسبالى أنا هى "أمى" وبالنسبالك إنت ممكن تكون (أمك، بنتك، أختك، مراتك، خطيبتك، حبيبتك، جدتك) أيًا كان بقى مش مهم؛ المهم إنك هتلاقيها باصمة جواك بأثر دايم.. "البنت" لما بتكون طفلة بتفتح باب الجنة لوالدها.. لما بتكون زوجة بتبنى حياة أسرة.. لما بتكون أُم بتبقى الجنة تحت اقدامها.. لما بتكون حبيبة بتبقى مجرد الكلمة منها حتى لو فى أى موضوع أو سلام عادى تهوين لحاجات كتير.. أغلب البيوت قائمة على صبر بنات حواء.. كل الحواديت دايماً بتبتدى عند "البنت" وبتنتهى عندها.. لكل "بنت" صوتها من راسها وعندها هدف وشخصية ودراعها مش ملّوى وعينها بتحضن وقلبها سايع ومحتوى كل القريبين.. لكل "بنت" رغم الظروف قادرة تعافر فى وسط مجتمع تعتبر معافرة الراجل فيه أصلاً من المعجزات.. لـ كل "بنت" تحت أى سماء وفوق أى أرض.. شوية السكر اللى بيحلّوا مرار الأيام، وكفة الميزان اللي لا تستقيم الحياة إلا بوجودها.. كل سنة وإنتى طيبة وحنينة وعلى الراس.
ليست هناك تعليقات:
إرسال تعليق