إجمالي مرات مشاهدة الصفحة

الأربعاء، 20 نوفمبر 2019

إزاي تبقى مليونير وانت في التلاتينات؟

إزاي تبقى مليونير وانت في التلاتينات؟

وانا في الجامعة كان عندي واحد صاحبي شاطر أوي ومجتهد وبيعرف يكسب فلوس من أي بيزنس، بناء مواقع وتطبيقات شغال، تسويق شغال، افلييت شغال، مشاريع صغيرة شغال، وكان دايماً يقول انا عايز يبقى معايا مليون جنيه قبل ما أتم ال30 سنة، طبعاً كلنا كنا بنفضل نتريق عليه ونقوله انت بتحلم يا عم، والجامعة خلصت والسنين عدت وكل واحد أنشغل في حياته.

ومن يومين كان عيد ميلادي ال30 وافتكرت الحكاية دي، وقولت لما أروح أدور على صاحبي ده على الفيس بوك واكلمه واشوف بقى عامل إيه دلوقتي، لاقيت الأكونت بتاعه وبعتله "بقيت مليونير ولا لسه؟"، افتكرني وأفتكر كلامه وقعد يضحك، وقالي إنه حقق الحلم ده من 3 سنين وأنه بقى شريك في اكتر من مشروع ناجح.

طبعًا كان عندي فضول رهيب أني أعرف هو عمل كده إزاي، وفعلًا سألته، وقالي إن مفيش كتالوج أو خطوات لو نفذتها هتبقى مليونير في التلاتينات أو في اي سن، الفكرة في العقلية اللي تساعدك تعمل ثروة، وفي طريقة تعاملك الصح مع الفلوس، أنك تكون عارف أزاي تكسب فلوس وإزاى تستثمرها.

بعد ما اتكلمت معاه، تحمست جداً، وبدأت ادور على معظم الشخصيات الناجحه اللي قدروا يحققوا ملايين في سن صغير عشان أشوف إيه الصفات المشتركة ما بينهم، ولاقيت ان كلهم بيقولوا نفس الكلام اللي صاحبي بيقوله، أن بناء الثروة بيتلخص في تلت نقاط:

1 - وجود مصادر متنوعة للدخل:
في دراسة قام بيها الكاتب توماس سي كورلي استمرت لمدة ٥ سنين لاكتشاف أسرار أصحاب الملايين، اكتشف ان دايما أصحاب الملايين بيكون عندهم مصادر دخل متنوعة، وأن 65 % منهم بيكون عندهم على الأقل 3 مصادر للدخل، و45% منهم عندهم 4 مصادر، و29% عندهم 5 مصادر أو أكتر، والمصادر دي تنوعت ما بين استثمارات في سوق الأسهم والسندات، إيجارات عقارية، ومشاريع تجارية مختلفة.

وجود مصدر دخل واحد ممكن يساعدك توفر احتياجاتك وتسدد فواتيرك وتعيش كويس، لكن مش هيخليك مليونير، عشان تبني ثروة، لازم يكون عندك اكتر من مصدر للدخل، يعني يكون عندك وظيفة ثابته وفي نفس الوقت بتشتغل فري لانسر أو عندك مشروع صغير أو مشارك في مشاريع او عندك أصول وبتستفيد من عوائدها أو أي وسيلة تانية تساعدك تزود دخلك، والأهم أنك تكون عارف أزاي تدير وقتك ومجهودك وفلوسك بين المصادر دي. 

2 -الادخار من أجل الاستثمار:
وليام دانكو في كتاب "The Millionaire Next Door" بيقول أن أفضل نصيحة لبناء الثروة هي الالتزام بإدخار 20 % من دخلك بشكل دائم للاستثمارعلى المدى البعيد، يعني لو انت بتكسب 1000 جنيه في الشهر، تصرف 80% فقط من المبلغ ده وال20% الباقي تدخرهم عشان تستثمر بيهم.

لو نفذت النصيحه دي بعد فترة هيكون معاك مبلغ جاهز للاستثمار، وعلى حسب المبلغ اللي معاك، أبدأ شوف أفضل فرص متاحة قدامك، يعني الأفضل لو استثمرت في مشروع صغير ولا لو شاركت في مشروع قائم بالفعل ولا لو استثمرت في العقارات مثلاً ؟.

وأيا كان اختيارك، المهم أنك تستثمر في حاجه انت فاهمها ودرستها وشايف أنها ممكن تحقق ربح كويس في المستقبل. ولازم تكون عارف كمان أن اي استثمار محتاج صبر، لأنك مش هتحقق أرباح كبيرة في يوم وليله، يعني الموضوع ممكن يحتاج شهور او سنين عشان يحققلك عائد جيد.

3 - الأستثمار في نفسك:
براين ترايسي بيقول "استثمر على الاقل 3% من دخلك فى تطوير نفسك من أجل أن تضمن لنفسك مستقبل أفضل"، ودي أحسن نصيحة ممكن نقولها لأنك عشان تقدر تستثمر محتاج تزود دخلك وعشان تزود دخلك محتاج الأول أنك تستثمر في نفسك وتطور من نفسك وتتعلم مهارات جديدة تخليك تعرف تشتغل في مجالات مختلفة او تساعدك تكتسب المعرفة المطلوبه لتحقيق أهدافك.

معظم الناس اللي حققت نجاحات كبيرة في حياتها كان دايمًا عندهم شغف التعلم واكتساب المعرفة، وده ساعدهم يكونوا مبدعين ويشوفوا الفرص اللي محدش شايفها، زي صاحبي اللي دايماً تلاقيه بيحضر الكورس الفلاني أو التدريب الفلاني أو بيقرا كتب أو بيحضر ندوات، وعمره ما كان بيضيع وقته ابدًا في اي حاجة مش مفيدة، وكل ده ساعده يكتسب مهارات مختلفة وبالتالي كان هو الوحيد اللي قدر يشتغل ويزود دخله ويستثمر، ويبدأ مشروعه الأول واحنا في تانية جامعة.

والخطوة الأولى قبل كل ده ان يكون عندك رؤية وأهداف مركز عليها وعايز تحققها، وكل ما كانت الأهداف دي واقعية ومحددة وقابلة للقياس كل ما أنت صدقتها ونجحت في تحقيقها، زي صاحبي اللي كان هدفه واضح ومحدد انه عايز يكون معاه مليون جنيه قبل ما يتم ال30 وبالتالي أشتغل على نفسه وأدخر واستثمر وقدر يحققه.

ليست هناك تعليقات:

إرسال تعليق