التفسير العلمي للسعادة والضحك والنوم

• هيحصل حاجة لو كل واحد خلّاه فى حاله وبطّل يدفس مناخيره فى الحاجة اللى ماتخصوش؟.. بالعكس؛ ده يمكن السلام يعم العالم.. طب لو الفضول والإستغراب بياكلوا فيك تجاه تصرف يخص غيرك؛ هيحصل حاجة لو افترضت العذر له؟.. لأ برضه.. فى كتاب( التفسير العلمي للسعادة والضحك والنوم ) اللى كتبه "د.أحمد مستجير" مكتوب فى صفحة " 148 " قصة حقيقية حصلت لواحد إنجليزى إسمه "ويلي أندرسون".. "ويلى" كان بيدفن أمه اللى اتوفت فى لندن .. غير إنها أمه وطبعًا ليها غلاوتها اللى مش شبه حد؛ بس " ويلى " كان وحيدها وحرفيًا ماكنش ليهم إلا بعض فتقدر تفهم من هنا شكل حزنه عليها كان عامل إزاى .. وهو شايل النعش بتاعها مع كذا واحد تانى ونازل بيه القبر والناس كلهم باصين عليه، ورغم دقة الموقف الكل إتفاجأ بيه إنه ساب النعش فجأة وضحك! .. ضحكة مكتومة فى الأول حاول يداريها بـ كف إيده بس مقدرش .. بقت ضحكة بـ صوت .. شوية والضحكة بقت قهقهة بصوت عالى أكتر ! .. كل ده والناس اللى حاضرة الجنازة مذهولين من الجنان اللى حصل لـ  "ويلى" ده ومحدش عارف سببه رغم إنه فى الطبيعى كان شاب عاقل يعنى .. بس حتى لو طلبت معاه جنان أكيد يعنى مش هيكون فى الموقف ده .. حالة من الضحك الهيستيرى صابته وسيطرت عليه وطلع يجرى بعيد .. الناس جريوا وراه ومسكوه وهما متأكدين إن فيه حاجة مش طبيعية حصلت فى عقله .. نقلوه المستشفى .. إتحجز هناك يومين وبعدها مات!.. لما اتفحصت الجثة بعد وفاته اكتشف الدكاترة إن كان فيه ورم موجود فى شريان فى قاع المخ إنفجر، ولما إنفجر ضغط على غدة إسمها ( الهيبوثالامس ) وبعض الشرايين اللى حواليها، وإن ده هو اللى سبب لـ "ويلى" حالة الضحك غير مبررة .. ماكنش ضحك هزار ولا فرفشة ولا جنان .. كان ضحك لا إرادى إتسببت فيه ضغط الدم على الغدة دى .. بمعنى أدق كان بيموت من الوجع وشكله بيضحك .. نوبة إكتئاب حادة أصابت أصدقائه الثلاثة لمجرد إنهم حسوا بإساءة الظن ناحية صديقهم لأنهم حكموا عليه من مظهره ومحدش حط إحتمال ولو 1% إنه معذور.

 • مفيش حد مش عايز يكون فى أفضل شكل، ووضع إجتماعى، ونجاح وتبقى كل أموره تمام التمام.. فى نفس الوقت محدش عارف تفاصيل ظروف غيره؛ بالتالى أسئلة من نوعية: (هنفرح بيكى إمتى وأخبار النتيجة إيه و ياه إنت تخنت أوخسيت ليه و مفيش نونو جاى فى السكة وإنت بتقبض كام) مكانها أقرب صفيحة زبالة لأن إجاباتها لا تخص اللى بيسأل ولا أهله، ومش بيحركها إلا الفضول البارد اللى سببه الحشرية والتقطيم أو تلقيح الجتة.. أنا إتنين؛ واحد إنت شايفه، والتانى ماتعرفش عنه حاجة بس عايز تشوفه بالعافية!.. الأديب "الرافعي" قال: (مادام لكل انسان باطن لايشركه فيه الا الغيب وحده؛ ففي كل إنسان تعرفه إنسان لا تعرفه).. تعرف إيه إنت عن ظروفى الصحية والمزاجية والأسرية والنفسية وعلاقاتى؟.. تعرف إيه عن أسباب قراراتى؟.. ولا حاجة لأنك مش عايش معايا، ولأنى طبعًا أكيد مش هقدم تقرير يومى لسيادتك.. محدش عارف ظروف حد وكلنا مليانين جروح مش متشافة والكل بيتدارى ورا شوية معافرة ..  الأديب " يوسف السباعى " قال : ( لوُ استطعنا الوصول إلى اختراعٍ نُبصر به دخائل النُفوس ونطلع به على خبايا الأفئدة لأدهشنا الفرق بين ما تضمر وما تظهر وصدمنا التَناقض بين ما تَكشف عنه الأعماق وما تبديه لنا المظاهر).

لماذا تنحى لاري بايج وسيرجي برين مؤسسا جوجل؟

لماذا تنحى لاري بايج وسيرجي برين مؤسسا جوجل؟

عادة بنشوف في الأفلام الأجنبي إن الشخص لما بيوصل لسن الشباب بيقرر ينفصل عن أهله ويببقى هو المسئول عن نفسه، بس المفاجأة إننا نشوف ده بيحصل في عالم الشركات خاصة بعد ما استخدم "لاري بايج وسيرجي برين"، مؤسسي شركة جوجل، الوصف ده في الرسالة اللي أعلنوا فيها تنحيهم عن منصب المدير التنفيذي لشركة Alphabet الشركة الأم لجوجل بعد 21 سنة من تأسيسهم ليها.

والحقيقة إن قرار التنحي ده كان مفاجئ لناس كتير، لكن اللي متابعين الشركة من فترة فهو مكنش مفاجئ ولا حاجة وده لأن "بيج" و"برين" تقريبا مكنوش بيظهروا في أي أحداث لها علاقة بالشركة في السنين الأخيرة، ده غير إن معظم مهامهم الإدارية اليومية كان بيتم تفوضيها لنوابهم، وحتى إدارة جوجل نفسها اللي بدأوها من 21 سنة، تركوها لـ"سوندار بتشاي" المدير التنفيذي لجوجل من سنة 2015.

وبالرغم من إن "بايج وبرين" أعلنوا تنحيهم عن منصب المدير التنفيذي ل Alphabet إلا إنهم هيفضلوا مكملين في مجلس إدارة الشركة وهيحتفظوا بنسبة 51% من أسهم التصويت بتاعتهم زي ما هي.

الكلام اللي فات ده بيودينا لسؤال مهم، وهو ليه مؤسسي واحدة من أكبر وأضخم الشركات في العالم خدوا القرار ده؟ ومين هو سوندار بتشاي اللي اختاروه عشان يمسك المنصب بدالهم؟

"بايج" و"برين" في بداية عملهم على محرك البحث جوجل كانوا سبب إن المعلومات الكتير اللي مفيش عليها كنترول على الإنترنت أصبح من الممكن احتوائها، ده غير إن طريقتهم في إدارة الشركة من خلال تقديمهم لمميزات سخية للموظفين بقت معيار لكل الشركات اللي بتشتغل في وادي السيلكون اللي جوجل تعتبر حجر زاوية ومكون رئيسي فيه.

وكل ده طبعا خلى جوجل تسيطر على كتير من الأسواق العالمية، فمن ناحية هنلاقي إن محرك بحثهم بيتعامل مع 9 من أصل كل 10 عمليات بحث بتتم على الإنترنت، ومن ناحية تانية برنامج الأندرويد اللي بيمتلكوه بيشغل تقريبا تلت أرباع التليفونات المحمولة على مستوى العالم، ده غير إن اليوتيوب اللي الشركة استحوذت عليه سنة 2006 بقي البديل الأول للتلفزيون عند أجيال كتير من الشباب حاليا.

التشعب الكبير اللي وصلتله جوجل في مجالات: البحث، الإعلانات، الخرائط، برامج السوفت وير، الفيديو على الإنترنت، ده غير المشاريع الناشئة في مجالات بعيدة عن تركيز جوجل زي طيارات الديلفري بدون طيار drone deliveries وغيرها، كان بيقابله قلة رغبة من "بايج وبرين" في الإدارة والمشاكل الكتير المتعلقة بيها بالإضافة لتفضيلهم التركيز على مشاريع تانية غير محرك البحث اللي بقي تقريبا ملوش منافس، عشان كده أعلن الثنائي سنة 2015 عن إعادة هيكلة شركة جوجل وتحويلها إلى شركة ألفابت Alphabet وهي شركة بتضم جميع المشاريع تحت مظلتها ومن ضمنها جوجل وتم الإعلان إن المدير التنفيذي لجوجل هيكون سوندار بتشاي.

والحقيقة إن من وقت تأسيس ألفابت وهما الاتنين أصبحوا منشغلين أكتر في المشاريع العلمية اللي بتهتم بتطوير الذكاء الاصطناعي والشركات الخاصة اللي أسسوها من مالهم الخاص بعيدا عن جوجل، لحد ما أخيرا تركوا أمر ألفابت وجوجل لسوندار بتشاي، والنقطة دي تنقلنا للسؤال التاني مين هو سوندار وازاي وصل إنه يكون المدير التنفيذي لواحدة من أكبر الشركات في العالم؟

سوندار بتشاي ولد في الهند وهو من أسرة متوسطة، التكنولوجيا الأساسية في حياته وهو صغير كانت امتلاك أسرته لجهاز تليفون الجيران بيجوا يستخدموه من عندهم لأن مكنش في ناس كتير بتمتلكه وقتها، والحقيقة إن لغاية سوندار ما راح للولايات المتحدة في منحة لجامعة ستانفورد سنة 1993 كان عمره ما امتلك جهاز كمبيوتر قبل كده.

بتشاي انضم لجوجل سنة 2004 وتدرج في الأدوار اللي كان مسئول عنها، فمن الإشراف على جوجل كروم، وبعدين بقى مدير منتجات جوجل ورئيس نظام التشغيل "أندرويد" والمدير التنفيذي لجوجل في 2015، لغاية ما بقى حاليا المدير التنفيذي للشركة الأم العملاقة ألفابت.

تولي "بتشاي" قيادة ألفابت وجوجل جاي في وقت مش سهل أبدا وده لأن الشركة بتعاني من تحديات كبيرة في الوقت الحالي:

• فعلى المستوى الخارجي، الشركة بتعاني من تدقيق الحكومات والمجتمعات في قارات مختلفة في أعمال الشركة واللي أدى لمشاكل قانونية وتنظيمية لجوجل خاصة المتعلقة بمواجهة الاحتكار وحماية الخصوصية.

• وعلى المستوى الداخلي، السنة اللي فاتت مثلا أعداد كبيرة من موظفي جوجل عملوا مسيرات احتجاجية ضد ثقافة العمل اللي شايفين إنها بتغض النظر عن مشاكل التحرش الجنسي والعنصرية جوه جوجل.

سوندار عادة بيتمتع بخطاب هادئ ومش بيميل للمواجهة، عشان كده رده على الاحتجاجات دي إنها مفيدة لجوجل وإن كل الاقتراحات البناءة اللي طرحها الموظفين هتساعد في تحسين السياسات والعمليات جوه الشركة وإن الشركة جادة في توفير مكان عمل آمن وشامل للجميع.

تنحي "لاري بايج وسيرجي برين" من رئاسة ألفابت هو بالتأكيد نهاية لمرحلة مهمة في تاريخ جوجل، واحنا حابين تشاركونا رأيكم عن المرحلة الجاية هل الإدارة الجديدة للشركة هتقدر تكمل في المسار وتواجه التحديات ولا لا؟

ستاربكس ولوكين الصينية.. مين هيطحن التاني؟

ستاربكس ولوكين الصينية.. مين هيطحن التاني؟

سنة 1999 شركة ستاربكس دخلت السوق الصيني لأول عشان تكون على مدار الـ20 سنة اللي فاتوا هي الرائدة والمسيطرة على مجال صناعة القهوة هناك، وده بحصة سوقية وصلت في 2017 إلى 80% وفقا للتقديرات الخاصة بشركة Euromonitor International البحثية، وفي خلال الوقت ده ستاربكس قدرت إنها تمتلك 3922 فرع على حسب البيانات اللي أصدرتها الشركة عن الربع التالت من 2019.

بس الوضع ده ابتدى في السنتين اللي فاتوا يتغير بشكل كبير وسريع جدًا، خاصة مع ظهور شركة لوكين " Luckin" وهي شركة ناشئة تأسست في 2017، وفي خلال الفترة البسيطة دي قدرت إنها تنتقل من امتلاكها لفرع واحد تجريبي في بكين إلى 2370 فرع في 28 مدينة ووصل قاعدة عملائها خلال المدة دي 16.8 مليون عميل بمبيعات 90 مليون كوب قهوة، وده وفقا لبيانات الشركة اللي أصدرتها في 31 مارس 2019.

لوكين كمان مش ناوية تكتفي بعدد الفروع ده وبس ولكنها بتخطط إنها تفتح فرع كل 4 ساعات عشان في نهاية 2019 توصل لعدد 4500 فرع تتخطى بيهم عدد فروع ستاربكس اللي في المقابل بتستهدف فتح فرع كل 15 ساعة ويكون عدد فروعها في العام 2023 حوالي 6000 فرع.

ولو جينا نشوف هل النمو السريع لشركة لوكين في الصين بالطريقة دي هيشكل خطر على شركة ستاربكس، هنلاقي إن الخطر ده ممكن يكون ظاهر في تباطؤ نسب نمو ستاربكس اللي وصلت في الربع الأخير من 2018 إلى 1% بعد ما كانت النسبة في السنة اللي قبلها 8%.

وده بيخلينا نطرح سؤال هو ازاي لوكين عرفت تشكل الخطر ده؟ والحقيقة إن الأسباب كتير منها على سبيل المثال:

• نموذج العمل: لوكين بتركز على إن فروعها تكون صغيرة وبيشتغل فيها بس فردين لصنع القهوة وفرد تالت لتقديمها للعملاء وعدد قليل جدا من الكراسي، والفروع مصممة على إنها تقدم خدمة التوصيل والتيك أواي فقط على عكس ستاربكس اللي بتتيح أماكن وصالات واسعة للجلوس.

• التكنولوجيا: شركة لوكين بتعتمد بشكل أساسي على التكنولوجيا من خلال الأبليكشين الخاص بيها، فالعميل بيطلب الأوردر ويحدد هو هايروح ياخده بنفسه ولا يجيله ديليفري والدفع بيكون أونلاين فقط ومفيش إمكانية الدفع في المحل، ده غير إن الابليكشين بيساعد لوكين كمان على جمع بيانات عملائها فهي بتقدر تتعرف على العميل بيحب انهي نوع من القهوة وطلبها من انهي فرع والوقت اللي طلب فيه الاوردر وده بيمكنها من إنها تحسن من مستوى القهوة والخدمة اللي بتقدمها لعملائها.

• المنافسة السعرية: لوكين قامت بتسعير منتجاتها بنسبة 20% أقل من ستاربكس، ده غير إنها بتقدم برومو كود وعروض خصم بشكل قوي ومتواصل، فعلى سبيل المثال متوسط سعر كوب القهوة في ستاربكس 4.80 دولار وفي المقابل لوكين بتبيعه ب 3.50 دولار، ومع عرض زي اشتري كوب وخد التاني مجانا فسعر الكوب ممكن يصل ل2.5 دولار، وحتى الوجبات الخفيفة هنلاقي لوكين بتقدم خصومات بتصل لحوالي 44%.

•  منافسة مكانية شرسة: حوالي 1100 فرع تابعين لشركة لوكين هنلاقيهم موجودين على مسافة 5 دقايق مشي من فروع ستاربكس ده غير إن فيه فروع أقرب من كده كمان، وده معناه إن حوالي 46% من فروع الشركة بتخدم في نفس المناطق البيعية الخاصة بستاربكس، ده غير إن ستاربكس معظم مواقع فروعها موجودة في مدن كبيرة وبالتالي تفضيلات العملاء في المدن دي ممكن تتوافق مع ستاربكس، لكنها لغاية دلوقتي معملتش اختراق للمناطق الأكثر محلية واللي هتحتاج عشان توصلهم إنها تغير من نموذج عملها واللي بتقدمه وده لسه محصلش.

وبالتالي لوكين بتقدم نموذج بيعتمد على إنها شركة محلية عارفة الذوق المحلي وبالتالي بتوفر راحة عالية للعملاء بأسعار منخفضة التكلفة ومن غير مايوقفوا في طابور أو قائمة انتظار طويلة، بس السؤال هل على المدى الطويل شركة لوكين فعلا هتقدر تزيح ستاربكس في الصين؟، الحقيقة إن فيه شكوك كتيرة حوالين إن ده ممكن يحصل لأسباب منها مثلا:

• المخاطر اللي محتمل تتعرض لها لوكين أكبر بكتير من ستاربكس، وده لأن لوكين بتخسر حوالي 130 مليون دولار سنويا، فالشركة أعلنت عن إنها في 2018 تعرضت لخسارة صافية بلغت 241 مليون دولار في مقابل إن إيراداتها بلغت 125 مليون دولار، أسباب الخسارة معظمها كان بسبب التوسع الكبير اللي الشركة بتقوم بيه، خسارة البدايات دي الشركة بتأمل إنها تتحول بعد كده لمكاسب في حالة إن أعداد العملاء تزيد بشكل كبير، وده طبعا شيء مش مضمون على الإطلاق.

• ستاربكس مؤخرا ابتدت تواجه منافسة لوكين ليها فقدمت خدمة الديلفري في سبتمبر اللي فات وده بعد اتفاقها مع “علي بابا" أكبر منصة بيع الكتروني في الصين على تقديم خدمة التوصيل المنزلي.

• ستاربكس بتتبع خطة نمو سريعة ولكن مش بنفس سرعة لوكين، ففي خلال السنة دي زادت عدد فروعها بنسبة 16% وده في الوقت اللي الفروع دي المبيعات فيها ارتفعت بنسبة 6%، وده معناه إن ستاربكس بتوسع من فروعها من غير ما تضحي بمبيعاتها زي ما لوكين بتعمل.

• ستاربكس بتمتلك المحلات اللي بتبيع فيها، لكن لوكين بتمتلك عدد قليل جدا من المحلات والباقي كله إيجارات معظمها غير مسجلة وبالتالي فهي في أي لحظة ممكن تتعرض لمشاكل غرامة أو إلغاء عقود الإيجار وده طبعا معناه خساير هاتبقى غير محتملة بالنسبة ليهم.

• ستاربكس نجاحها بيعتمد على القهوة والتجربة اللي بتقدمها للعملاء، فهي بتقدم قهوة رائعة في محل فخم وبموقع متميز، وده مش نفس النموذج اللي بتقدمه لوكين واللي بيعتمد على سهولة الطلب وتوفير الوقت والتكلفة للعملاء أكتر من تركيزها على القهوة نفسها، صحيح إنها مش سيئة ولكن مش هتلاقي نوع قهوة مميز أو أجواء فخمة، عشان كده هو ممكن يكون منافس للمتاجر الصغيرة زي سيفين اليفين أكتر من ستاربكس.

المؤشرات بتقول إن لوكين قادمة بقوة ومش بس في الصين لأنها بتحاول تتوسع عالميا كمان، فهنشوف الفترة الجايه هل الشركة الناشئة دي هتنجح تعمل كده ولا هتختفي وتفشل زي غيرها في النهاية.

في ناس كتير مش عارفة تنظم وقتها

السلام عليكم 🌿
في ناس كتير مش عارفة تنظم وقتها وديما مش بتعرف تمشي علي جدول معين
كان في نموذج اسمه نموذج ايزنهاور
ده عباره عن ٤ جداول كل جدول بتكتب فيه  أولوياتك يعني
"الجدول الاول " الأمور الهامة والعاجله
هتقولي اي هيه هقولك زي المذاكره او امتحان لو انت شغال شغل مطلوب في وقت معين
" الجدول الثاني " الأمور المهمه وليست عاجله
يعني مثلا انا عاوز اتعود اني اقراء كل يوم عدد من صفحات كتاب او اني اعمل التمارين ودي تعتبر فكره الجروب وهي اكتساب عاده جديده
طيب انا مش بطول في الحاجه دي وبزهق ده لأنك بتكون متحمس جدا وبعد يومين الحماس بيقل  فالاحسن انك تبدأ بحاجه صغيرة جدا يعني مثلا انا عاوز  اتعود اني اقرا كتب فتبدأ بحاجه صغيره أول يوم مثلا نبدأ ب١٠ سطور وده تخليه عاده وطبعا هتقدر تعملها حتي لو مشغول مثلا انا عاوز  أتطبع اني اقراء ورد يومي في القرآن  يبا في البدايه كده ابدا بايه كل يوم وخليها جزء من حياتك يعني فرغ نفسك حتي لو عشر دقائق قبل النوم
"الجدول الثالث "  ليست هاما ولكن عاجله "
مثلا حد طلب منك حاجه دلوقتي وديه ممكن انك تخلي حد غيرك يقوم بيها لو انا في الشغل مثلا والمدير عاوزاني دلوقتي اخلص الشغل ده وهو لسه طالبه  لو الشغل ده لا يتخطي ٣٠ دقيقه اعمله ولو تقدر تخلي حد غيرك يقوم بيه  يكون أفضل
"الجدول الرابع "  ليست هاما وليست عاجله "
ودي أقرب مثال ليها السوشيل ميديا  يعني ممكن معملهاش اصلا
* طيب انا مش بقدر اسيب الموبايل ودايما فاتحه الفيس ٠
اولا لازم تعرف اذا كنت بتستفاد من الجلوس علي  السوشيل ميديا ولو كنت بتستفاد  فعلا حدد وقت معين تفتح فيه وياريت يكون وقت صغير لأنه مع زياده الجلوس علي الفيس وفي موقع اخر ده بيعمل تشتت لعقلك حتي لو سبت الموبايل دايما وانت بتعمل حاجه مهمه شيل الموبايل بعيد عنك

هذا الطالب لا يصلح جراحا أصلا

لما جاء مجدي يعقوب يناقش الماجستير بتاعه في جراحة القلب كان تقرير الدكتور المشرف عليه ورئيسه في القسم 👈 "هذا البحث غير صالح وأن هذا الطالب لا يصلح جراحا أصلا" .. وبسبب ذلك عيادة مجدي يعقوب نادراً ما يزورها مرضى ‼️

 عمل ايه مجدي يعقوب❓
 سافر إنجلترا وقدم "نفس" البحث في أعرق جامعاتها وتم قبوله وصنف على أنه أهم الأبحاث العلمية المبتكرة المبدعة في المجال‼️
 تلف الأيام ويصبح مجدي يعقوب من أهم جراحي العالم وتمرض بنت مشرفه ورئيسه المصري - الذي لم يعرفه بعد كل هذا الوقت - لتأتي تحت يد مجدي يعقوب.. فيقوم لها بالعملية التي أنقذت قلبها ويدفع مصروفات المستشفى ويعامل أستاذه بكل احترام وأدب.. فتعجب الأستاذ من هذه المعاملة وشكر مجدي يعقوب كثيرا على نجاح عملية ابنته وكل هذا الاحترام وسأله عن سبب ذلك، فرد مجدي يعقوب أنه واجبه تجاه أستاذه، فرد الأستاذ عليه ولكني لا أتذكرك
- رد يعقوب حضرتك كنت رئيسي ومشرف بحث الماجستير منذ عشرات السنوات
- فسأله هل حصلت على الماجستير تحت إشرافي؟ وما كان تقريري على بحثك؟
- رد يعقوب : حضرتك قدمت لي نصائح غالية أثناء إشراف سعادتك وكان تقرير حضرتك أن البحث غير صالح وأنني لا أصلح جراحا من الأساس ‼️رغم أن "نفس" البحث نال جوائز عديدة خارج مصر ‼️
- فاستحى الأستاذ رئيس القسم من نفسه بعد هذا العمر وأحنى رأسه خجلا
- رد المشرف متعجبا كيف لم تحصل على الماجستير تحت إشرافي وأنت الدكتور مجدي يعقوب؟، مستحيل مستحيل‼️
- الدكتور يعقوب: كان لك الحق كل الحق أستاذنا الجليل، حضرتك حكمت طبقا للواقع وكان حكمك موضوعيا ولم تقصد أن تظلمني، أجابه المشرف أسف جدا يا دكتور للأسف لم أستوعب رسالتك المبدعة وكنت أعتبرها مجرد "خيال علمي" 😏😞.
👈 فاحتضنه مجدي يعقوب وقبل يديه وشكره وضمه إلى صدره ولم يتمالك نفسه من البكاء وقال له:✋ لولاك لما كنت أنا أنا الآن
=========
👈 لما حد يقولك "لأ" دلوقتي متزعلش.. بكرة "الكل" هيقولك "نعم"
👈 لما حد ميفهمكش دلوقتي متزعلش بكرة الأيام تفهمه لسه بعد فوات أوانه مش أوانك
👈 لما حد يسفهك أو يقلل ويسخر منك أشكره؛ لأنه أعطاك فرص لتكبر نفسك
👈 لما أبواب المجتمع تقفل في وشك أشكرها.. الأبواب دي قفلت في وش المجتمع نفسه إنما أنت ربنا سمحلك بالضرب في الأرض حيث شئت تفتح أبوابها ونوافذها
👈 لما حد يستخسر فيك خير متستخسرش أنت فيه وأعطيله من خيرك مش لازم تنضح بخل زيه
🎩 أشكروا الكذابين.. أشكروا الحاقدين.. أشكروا البخلاء.. أشكروا المتعالين المتكبرين.. أشكروا الأنانيين ..
🎩 أشكروهم جدا علشان عرفوكم قيمة أخلاقكم وكرمكم وطيبتكم..
🎩 أشكروهم جدا علشان عرفوكم إن كرم ربنا يفوق كل هذا النقص فيهم..
🎩أشكروهم علشان علموكم أن أبواب ونوافذ الله تسع أحلامك وأن جحورهم ضيقة جدا على أحلامنا
🎩 أشكروهم أنهم شافونا أغبياء ولكن الأيام كفيلة تعرف الكل من الغبي ومن المبدع الذي لم يفهمه فرسان المجتمع
 محدش يزعل من مؤذي ومتكبر.. مفيش وقت للزعل والإحباط والانكسار.. استثمروا كل ده لصالحكم واستقووا بالله عليهم.. لما يزيدوا الهدم عليك زد أنت الإنتاج الذاتي والبناء.. لما يملأوا الدنيا ظلاما حولك، أنرها أنت بروحك الطيبة
احفظ الله يحفظك ، احفظ الله تجده تجاهك ، إذا سألت فاسأل الله ، وإذا استعنت فاستعن بالله ، واعلم أن الأمة لو اجتمعت على أن ينفعوك بشيء ، لم ينفعوك إلا بشيء قد كتبه الله لك ، وإن اجتمعوا على أن يضروك بشيء ، لم يضروك إلا بشيء قد كتبه الله عليك ، رفعت الأقلام وجفت الصحف.

الذكاء المالي (كلام مهم)

الذكاء المالي (كلام مهم)
*********************
شخص دخله 5000 جنيه وينفق 5000 جنيه
إذا توقف عن العمل كم شهر يعيش؟؟
الثراء ليس هو كثرة المال بل هو كم تعيش بدون ما تقترض أو تمد يدك!!

لذا فإن حل المشكلة ليس أن يزيد الدخل

لذا يجب أن تعرف القاعدة التالية جيدًا :
أنفق أقل من دخلك، واستثمر وادخر

(ومما رزقناهم ينفقون) وليس كل ما رزقناهم

قواعد حُسن إدارة المال :
********************
أولا : اعرف نفسك
- من أنت وماذا يعني لك المال؟
- ما دوافعك وما أهدافك في الحياة؟
- معرفة الذات يجعلك تدير حياتك بشكل أفضل وليس مالك فقط

ثانيا : اكتب خطة مالية
- حدد أهدافك المالية في الحياة
- حدد مشترياتك الكبرى
- حلل وضعك المالي وحدد الفجوة بين وضعك وطموحك
- قسم أهدافك الكبرى ورتب أولوياتك
- ضع خطة للادخار مهما تكن الظروف

ثالثا : ضع موازنة والتزم بها
- حدد دخلك الشهري
- حدد مصروفاتك الشهرية
- حدد أولويات الصرف أو أي البنود يدخر منها
- رتب أوضاعك من أجل توفير المال لتحقيق أهداف خطتك المالية
- ضع خطة للادخار مهما تكن الظروف

رابعا : ادخر على الأقل 10% من دخلك
- قلل مشترياتك
- اشتر ما تحتاجه فقط وابحث عنه بسعر مخفض
- لا تذهب إلأى السوق إلا بقائمة
- لا تستخدم بطاقة الائتمان (هام جدا)

رابعا : ادخر
- لا تذهب للسوبر ماركت وأنت جائع
- احصر ما تريد شراؤه في قائمة
- التزم بقائمتك مهما حصل
- اذهب مرة أسبوعيا أو شهريا
- كل في البيت صحي وأوفر
- الماركات : أنت تدفع ثمن الدعاية الخاصة بها
- احذر المقاهي والمشروبات الغالية

خامسا : احذر الدين
- ما لا تملك ثمنه، هو شيء لا تحتاجه
- الدين يأتي في الغالب من نزوات التمتع وضعف ضبط النفس أو من غياب الخطة المالية واضطراب الأولويات

سادسا: احذر التسويف
- ماذا تنتظر ابدأ الآن
- ما الذي يمنعك من البدء
- الأماني رأس مال المفلسين

كي تكون ثريا عليك أن تمر بالمستويات الثلاثة :
الاستقلال : أن يكون لديك ما يكفيك دون أن تمد يدك إلى أحد
الراحة : أن يكون لديك ما يكفيك وزيادة لبعض الرفاهية
الثراء : أن يكون لديك صافي يتعدى ما يكفيك حاجة ورغبة

أما القفز من الفقر إلى الثراء فهذا يحتاج معجزة أو تكون لص أو تتزوج من ثرية أو ترث.

📌 40 نصيحة مهمة لأبنائنا المهندسين حديثي التخرج

📌 40 نصيحة مهمة لأبنائنا المهندسين حديثي التخرج
  ➖➖➖➖➖➖➖➖➖➖➖➖➖➖

1. الوضع حالياً سواء في مصر أو دول الخليج مش في أفضل حالاته طبعاً و الرواتب مش متناسبه مع الأسعار و مش بسهوله هتلاقي شغل بعد التخرج.. و لكن مع كل ده في ناس بتنجح و بوصل لأهدافها و لازم يكون عندك أمل و ماتيأسش و ماتستلمش لكلام الأشخاص المحبطين اللي هتسمعه كتير الفترة الجاية.

2. بالنسبة للـ CV لازم تكتبها بشكل إحترافي و لو عملت Search هتلاقي مواقع كتير عليها نماذج جاهزة للـ CV تقدر تستخدمها، و الـ CV بتاعتك لازم تكون English و يكون الـFont المستخدم Formal ، و ماتعملش Frame للـ CV و ماتستخدمش ألوان كتير ولا أكتر من Font، في بداية الـ CV بتكتب اسمك و رقم موبايلك و الـ e-mail بتاعك و بعدين الـ Career Objective و الـ Education و بعدها لو في أي خبرات سابقة ليك هتكتبها.. لو مافيش هتكتب الـ Skills بتاعتك و كل البرامج اللي بتشتغلها و الكورسات اللي أخدتها، و آخر حاجة في الـ CV هي بياناتك الشخصية كاملة زي موقفك من التجنيد و الحالة الإجتماعية و محل اللإقامة.. إلخ.

3. خلي بالك إن الـ CV ليها دور كبير جداً لأنها بتدي إنطباع مبدئي عنك، و لو الـ CV بتاعتك مش معموله بشكل إحترافي فرصتك في إنك تلاقي شغل هتكون ضعيفة فعلاً.

4. الـ CV للمهندس حديث التخرج ماينفعش بأي حال من الأحوال تزيد عن صفحتين.. و ممكن تكون صفحة واحدة.

5. الـ Smart CV مش دايماً بتكون أفضل حاجة بالنسبة لمهندسين مدني.. الـ CV التقليديه بتدي إنطباع أفضل عنك و بتكون أوضح في الطباعة.

6. الـ CV ماينفعش يكون فيها أي بهرجة.. كل ماتكونSimple كل ماتكون أفضل و أنسب.

7. لما تبعت الـ CV بتاعتك لأي شركة لازم تبعتها من الإيميل الخاص بيك ولازم يكون اسم الإيميل Formal و مهم جداً إنك تكتب في خانة الـ Subject كود الوظيفة أو مسمى الوظيفة اللي انت متقدم لها.

8. ماتبعتش الـ CV لنفس الشركة أكتر من مرة.

9. ماتبعتش الـ CV لأكتر من شركة في نفس الإيميل و غلط تحط إيميلات الشركات على الـ CC ، و لكن ممكن تستخدم خانة الـ BCC بحيث مايظهرش للشركات اللي انت بتبعتلها إنك باعت لأكتر من شركة.

10. من أهم الخطوات اللي هتساعدك في رحلة البحث عن عمل هي إنك تعمل أكاونت على LinkedIn و تتابع فيه الشركات.

11. لازم تكون محدد هدفك و انت بتدور على شغل.. ولازم الـCV بتاعتك تعبر بوضوح عن الهدف ده، بمعنى إن ماينفعش تبقى انت بتقدم على شغل مهندس موقع و انت في الـ CV مركز على برامج التصميم و مش جايب سيرة أي دورات أو مهارات اكتسبتها ليها علاقة بالموقع، و ماينفعش تكون بتقدم على شغل مكتب فني و إنت ماتعرفش أي برامج ليها علاقة بالمكتب الفني، هكذا بالنسبة للتصميم و إدارة المشروعات، يفضل الـ CV بتاعتك اللي يشوفها يفهم منها إنت حابب تشتغل في إيه.

12. اختيارك للمجال و التخصص اللي حابب تشتغل فيه من أكتر الخطوات اللي هتساعدك سواء و انت بتطور نفسك أو و انت بتدور على شغل.

13. تحاول تركز على تخصص معين أو تخصصين و تطور نفسك فيهم قدر استطاعتك و تقدم في الشركات على الوظايف دي فقط عشان ماتشتتش نفسك.

14. طبيعي إنك تبقى تايه و مش عارف أصلاً سوق العمل شكله عامل إزاي و إية التخصصات اللي فيه و متطلباتها "

15. لما تروح نقابة المهندسين عشان تطلع كارنية النقابة.. هتلاقي كارنية اسمه "اتحاد المهندسين العرب" ده كارنية إختياري.. ماتطلعوش عشان غالباً مش هتستفيد منه في حاجه.

16. البطاقة العلاجية الخاصة بنقابة المهندسين مفيدة و هتوفرلك كتير لو بتتردد كتير على أطباء أو بتحتاج تعمل تحاليل و آشعات أنت أو حد من أهلك.

17. في رحلة البحث عن العمل لازم تشتغل على 5 محاور أساسية:

(1) متابعه إعلانات التوظيف على مواقع السوشيال ميديا و على جروبات التوظيف و على المواقع الخاصة بالتوظيف و من خلالها تبعت الـ CV بتاعتك للشركات اللي طالبه مهندسين.

(2) تطبع الـCV و تنزل بنفسك لمقرات الشركات و تقدم الـCV.

(3) متابعة إعلانات الجرائد زي الوسيط و الأهرام لأن في شركات مابتنزلش إعلانات على النت.

(4) الأكاونت الخاص بيك على لينكد إن.

(5) المعارف و العلاقات و الأصحاب اللي ممكن من خلالهم تعرف إن في شركات معينة طالبه مهندسين فتقدر تقدم فيها.

18. لازم تكون متوقع و مهيأ نفسك لإن مش بسهولة و بسرعة هتلاقي وظيفة مناسبة.. فلازم يكون عندك شويه صبر و إصرار و ماتيأسش.

19. لو إنت مابتعرفش تشتغل على برامج هندسية و مش واخد أي كورسات لازم تكون عارف إن فرصتك في إنك تلاقي شغل هتكون ضعيفة.. عشان كدة لازم تشتغل على نفسك كويس و تطور مهاراتك قبل ماتقدم على شغل.

20. لازم تسأل نفسك سؤال مهم قبل ماتبعت الـCV بتاعتك.. ليه صاحب الشركة هيشغلك؟ لازم تكون متميز في حاجة معينة عن غيرك عشان تكون فرصتك أكبر من باقي اللي هيقدموا.

21. في الإنترفيو.. أهم حاجة ثقتك بنفسك و إنك ماتبالغش في تقديرك لذاتك و تكون لبق و مظهرك كويس و تبين لصاحب الشغل إنك عندك المقدرة على التعلم بسرعة.

22. مافيش حاجة اسمها أسئلة الإنترفيو لازم تذاكرها قبل ماتروح.

23. مهم إنك تعرف معلومات عن الشركة اللي مقدم فيها قبل الإنترفيو.

24. في الإتفاق على الراتب لازم تكون عارف متوسط راتب دفعتك في حدود كام، ولازم تتفق على كل التفاصيل و البدلات الخاصة بالشغل.

25. لازم يكون عندك فكرة كافية عن مسوغات التعيين والتأمينات و عقد العمل و قانون العمل و حقوقك في الشركة قبل ماتشتغل.

26. لو مقاول طلب منك إنه يأمن عليك عشان يقدر يشيل شغل (بدون ماتكون شغال معاه فعلياً) ماتوافقش تحت أي ظرف حتى لو هيدفعلك مبلغ كبير.

27. إياك و مكاتب التوظيف لأن أغلبهم غير صادقين و بيستغلوا حاجة حديثي التخرج.

28. إوعى تحت أي ظرف تملأ أبليكيشن للشغل بفلوس.

29. ماتدفعش لحد فلوس عشان يسفرك بره.

30. ماتسافرش على فيزا بوظيفة تانية غير مهندس.

31. فكرة إنك تسافر بلد بره مصر تدور على شغل هناك و انت مالكش فيها معارف دي مش أفضل فكرة في الدنيا.

32. يفضل تشتغل في بلدك الأول على الأقل سنة تكتسب فيها خبرة و بعدين تسافر على فرصة أفضل عشان ماتتعبش.

33. فترة ماقبل الجيش فترة مدمرة للأعصاب لأنك بتكون مش عارف تقدم على شغل ولا عارف تسافر.. عشان كدة لازم تحاول تستغل الفترة دي في حاجة مفيدة زي إنك تطور نفسك.. تتعلم برامج.. تاخد كورسات.. تنزل تدريب.. تشتغل أي شغل حتى لو مش في مجالك بس تكتسب منه خبرات و تكسب فلوس تساعدك في التطوير.

34. لو بتفكر تحضر ماجيستير لازم تسأل نفسك سؤال مهم.. إنت عاوز تحضر ماجيستير ليه. هل هو بالنسبةلك غايه ولا وسيلة! لو إجابتك إنه غايه يبقى بلاش تحضر ماجيستير.. إنما لو وسيلة لهدف محدد في دماغك يبقى توكل على الله بس إختار كويس إنت هتحضر في أي مجال و تخصص و في أي جامعة.

35. سوق العمل مابيعترفش بالشهادات و التقديرات و الدرجات العلمية بقدر مابيعترف بالمهارات و الخبرات.

36. لازم تكون عارف و متأكد إنك مهما أخدت راتب كبير.. مستحيل تقدر تحوش منه و تبني مستقبلك..الفلوس بتيجي من الشغل الخاص.

37. مش عيب إنك عشان تزود دخلك تشتغل شغلانه إضافيه بعيده عن مجالك.. العيب هو إنك تبقى مضغوط مادياً و مكسوف تشتغل.

38. لو شاطر في حاجة زي الـGraphic Design أو التصوير أو الكتابة أو البرمجة... إلخ، أو أي مجال ممكن تكسب منه فلوس.. حاول قدر إستطاعتك تستغل ده في شغل جانبي حتى لو Freelancer ، لأن الزمن اللي إحنا بنمر بيه حالياً مش زمن الوظيفة الواحدة.

39. اقطع علاقتك فوراً بكل الأشخاص المٌحبِطين و المُحبَطين و الكثيري الشكوى و التذمر و اللي بيتكلموا في المشاكل مش في الحلول و اللي طول الوقت مش راضيين عن أي وضع.. لأن وجودك جنب الناس دي هينقلك طاقة سلبية كافية جداً إنها تدمرلك مستقبلك.

40. لازم يكون عندك قناعة و يقين إن ربنا مش هيضيع تعبك و إن رزقك مكتوب لك و ماحدش هياخده غيرك إنت فقط المطلوب منك تسعى و تعمل اللي عليك وتأخذ بكل الأسباب الممكنه و تنتظر وعد ربنا بإنه مش هيضيعك.
........وربنا يوفقك ويختار لك الخير حيث كان .