عايز تشتغل و تنجح و تعمل فلوس و تبقي محترم و محبوب؟
الحل في ال Skills.
*****
عندك 20 فكرة و معلومة و نصيحة عن موضوع الSkills.
1 - في مقولة بتقول "Your skills will pay your bills"، و دي معناها إنك عشان تدفع فواتيرك و تعيش مرتاح، لازم مصدر كويس للدخل، و صحيح إن في طرق ملتوية للحصول علي الدخل، بس الطريقة الوحيدة الأخلاقية المضمونة هي الSkills.
2- الSkills (المهارات) غير الTalents (المواهب)، يعني ممكن تستغني عن المواهب لو عندك مهارات، و ليس العكس.
المؤلف والمحاضر الأمريكي الكبير (براين تريسي) بيقول العبارة دي: " All skills are learnable " .. يعني كل المهارات ممكن تتعلمها و تتقنها، و بيقول إنه بدأ حياته في وظايف متواضعة أوي بعدين اشتغل في الSales و كان بيقعد شهر كامل مايشتريش منه زبون واحد، لأن كل فكرته عن الSales إنه يقف قدام العميل يرغي، لغاية ما سأل زميله في المكتب اللي كان بيكسب 10 أضعاف مكسبه: انت بتعمل ايه؟ فقاله علي شوية خطوات و دربه عليهم، بيقول بعد شهر بالظبط كنت مدخل 10 أضعاف دخلي الحالي، لأن الSales (البيع) ده Skill ،، و كل الSkills ممكن تتعلمها و تطبقها.
3- لما بتتعلم Skill جديدة طبيعي تحس إنك تايه خالص و تسمع تريقة و ترتبك و تخاف و قلبك يضرب و تبقي قلقان حد يشوفك بتتعلم وخايف من نقد الآخرين، زيي أنا شخصيا لما كنت بتعلم السواقة و العربية بتكركر و ترجرج مني و صحابي بيضحكوا، و فجأة تلاقي واحد معدي من جنبك بسرعة و بيبصلك و يضحك ... و زي بالظبط اللي بيتعلم الEnglish و بيبقي الكلام طالع من بقه دبش و بيغلط وحواليه في الClass في همهمات من زمايله (بيضحكوا علي أخطائه). كل ده طبيعي.
الكاتب الأمريكي (هارف إيكر) قال العبارة دي:
"Every master was a disaster"
يعني كل واحد محترف في حاجة.. كان في يوم ولا يفهم حاجة فيها.
4- الSkills اللي انت محتاجها بينقسموا ل 4 أقسام رئيسية:
الأولي : (Language Skills) اللي هي اللغة أو اللغات اللي بتتحدثها، و دي بتنقسم ل 4 skills صغيرين هم: Listening , Speaking, Reading , Writing.
التانية: (IT Skills) و ساعات بنسميها (Technological Skills) يعني مهاراتك مع الكمبيوتر و التكنولوجيا عموما اللي انت محتاجها للعمل.
التالتة: (Business Skills) و ساعات بنسميها Soft Skills أو Communication Skills أو People Skills أو Interpersonal Skills .. و دي قدراتك علي التواصل مع الآخرين و إدارة حياتك و تعاملاتك معاهم. واسمها Soft Skills لارتباطها بالبشر.
الرابعة: (Hard Skills) و ساعات بنسميها Technical Skills،، و دي المهارت الفنية الخاصة بمجالك. فلو انت محاسب فالHard Skill هي المحاسبة،، و لو انت محامي فالHard skill بتاعتك المحاماة و القانون، و لو انت مهندس فالHard Skill بتاعتك الهندسة. و اسمها Hard skills لارتباطها بطبيعة الوظيفة .. بخلاف الSoft اللي اسمها كدة لارتباطها بالانسان.
5 - الإنجليزي، و الHard Skills (اللي هي مجالك) انت أدري بيها إزاي تقويها، ولو مش عارف يبقي تسأل المتفوقين في مجالك. و الIT Skills واضحة و معروفة، أقلها إتقان الOffice بمشتقاته .. و معاك و انت طالع بقي في الشبكات و البرمجة .. إلخ.
عشان كدة هنركز في اللي جاي علي ال Business Skills.
النقاط الجاية عن أشهر أنواع الBusiness Skills المطلوبة في العمل و من الآخر اللي بتجيب فلوس. 😀 هكتب معلومة بسيطة عن كل Skill منهم
و انت تقدر تدخل علي Coursera.org و Udemy.com و Edx.org هتلاقي كورسات مجانا أو بفلوس بسيطة أوي.
6 - أول و أهم واحدة و تعتبر المفتاح لكل اللي جاي هي: (Time Management) .. و دي لما بتتدرب عليها صح بتتعلم تستفيد من وقتك و تفيد غيرك، و تعرف تخلي وقتك بفلوس، و مع الوقت مفهومك للTime Management بيتطور لمفهوم الProductivity (الانتاجية)، إنك تطلع أحسن ناتج كما وكيفا من وقتك بدون الإخلال بإنسانيتك و مساحتك الشخصية و صحتك.
7 - لازم تعرف أساسيات الإدارة، عشان كدة تاني Skill هي (Business Management)، انك تعرف أركان إدارة الأعمال الأساسية، عشان لو حبيت تشتغل في المجال الإداري أو يبقي ليك بيزنس خاص بيك (أيا كان حجمه)، لأن للأسف أكتر من 80% من الشركات الناشئة بتفشل، لأنها بتبقي بالحب إلي أقصي درجة، و لما تقرا عن أسباب فشلها تلاقي أصحابها مكلفوش خاطرهم يعرفوا أساسيات أي بيزنس.
8 - تقريبا كلنا عارفين الHuman Resources أو الHR، بس قليل مننا يعرف خلفية الموضوع. أي شركة أو مصنع أو مؤسسة أو كيان لازمله 4 أنواع من الموارد:
موارد طبيعية Natural Resources (اللي هتحتاجه من الطبيعة)
موارد تكنولوجية Technological Resources (أي حاجة تم تصنيعها، من أول اللمبة لغاية الماكينات الضخمة و الكمبيوتر)
موارد مالية Financial Resources : الفلوس اللي هتبدأ بيها البيزنس.
موارد بشرية Human Resources : اللي هيدير اللي فوق ده كله. و بنسمها Human Resources لأن البشر زي الفلوس بالظبط، مورد يمكن تنميته و ممكن يضعف و ممكن يختفي .. أيوة ممكن لو انت صاحب مصنع فاشل تصحي الصبح تلاقي عمال المصنع كلهم مقدمين استقالاتهم و سايبينك.
9 - أيا كان البيزنس بتاعك، و أيا كان مجالك، لازم يبقي عندك فكرة محترمة عن ال(Customer Service Skills) .. و صدقني خدمة العملا مش هي موظف تي إي داتا اللي بيقولك اقفل الراوتر و افتحه، مفهوم و تفاصيل خدمة العملا لما بيتطبق في مجالات أخري زي الطب و الهندسة و التدريس و التدريب و البنوك بيخلي العميل عنده Customer Loyalty (ولاء للشركة و للمنتج)
10 - لأن الحياة قاسية و Unfair، و لأن ماحدش بيديلك اللي انت عايزه غير لما تقدمله اللي هو عايزه، لازم ال(Negotiation Skills) (مهارات التفاوض)، تتفاوض علي مرتب، تتفاوض علي مستحقات مالية، تتفاوض علي Deal معين. و التفاوض مش بيتم عن طريق إنك تقول للطرف الآخر " و النبي و النبي عايز كذا " .. لأ في شوية تفاصيل..
11 - نيجي للمعلم الكبير أوي .. مخ و روح الإدارة ..الMarketing.. و أكتر حاجة مظلومة في الSkills برغم أهميتها، لأن للأسف كتير من البهوات بيبدؤوا الشركة أو البيزنس و يقولوا هييييه عملنا شركة و طلعنا منتج ..يللا نشوف هنسوّقه ازاي .. و طبعا ده غلط، لأن الMarketing المفروض بييجي مع الPlanning في البداية و بيتدخل في تفاصيل اختيارك لمنتجك و مواصفاته عن طريق دراسات للسوق و المستهلك و طبيعتهم.
الMarketing فيه عشرات العشرات من التخصصات، فلو حابب ممكن تتخصص في حاجة زي الSocial Media Marketing
12 - و لإن مفيش Marketing من غير Sales، فلازم نوضح إن الSales مش الشخص السمج اللي بيتصل بيك يسوقلك منتج مضروب علي التليفون، ولا هو رجل المبيعات اللي لابس بدلة و بيسألك أسئلة شخصية و يقنعك إنك فزت بجايزة ماعرفش فين .. الSales معناه التأثير في سلوك العميل و نفسيته. لأن في عميل سريع في الشراء، و عميل متشكك، و عميل متردد، و عميل عدائي ... و لأن الSales بيتم بخطوات منطقية اسمها Sales Presentation ، بتبدأ ببناء الثقة مع العميل، ثم طرح اسئلة عليه، ثم الاستماع إليه، ثم تحديد المشكلة أو الاحتياج اللي عنده، ثم اظهار منتجك كحل لمشكلته، ثم الاجابة علي اسئلته، ثم الرد علي اعتراضاته و تخوفاته، ثم الClosing و اتمام البيع، ثم طلب الReferrals (الترشيحات) منه لأشخاص آخرين يشتروا المنتج ..و هكذا ..
13 - في الشركات المتوسطة والكبيرة، في Skill تعتبر فرع من فروع الإدارة، اسمها (Supply Chain Management)، و دي عالم تاني لوحدها، بتحتاج دراسة و تدريب دقيق، لأنها لما بتتم في الشركات بشكل علمي بتحقق طفرة من حيث التكلفة و الجودة و الوقت. و هي متصلة بشدة بمجال الLogistics.
14 - عايز تبقي Trainer ملو هدومك و كلامك مؤثر و تقدر تكسب كويس من وظيفتك؟ يبقي لازم تتدرب علي (Presentation Skills) و ال( Training Skills) و ال(Public Speaking Skills) .. و تشوف ايه الQualities (الصفات) اللي لازم تتوافر فيك، و ايه الSkills اللي لازم تنميها .. و اطمن .. ماحدش من الTrainers الجامدين اللي بيقفوا قدام الجماهير دول اتولد كده، و أنا عن نفسي أول 3 دقايق وقفتهم قدام الناس كنت هعيط من الخوف والكسوف .. بس زي ما قلنا، دي Skills و All Skills are Learnable.
15 - الSkill دي بقي تعتبر كلمة السر للتوظيف، هم 2 Skills متداخلين مع بعض أوي، اسمهم Personal Branding & Self-Marketing .. إنك ازاي تعمل لنفسك Brand،
و تسوّق نفسك للشركات كإنك منتج عالي، و تخلي نفسك مطلوب. و تعرف الصورة اللي واصلة للآخرين عنك ايه .. و ازاي تحسنها و تتخلص من عيوبك.
16 - في Skill عجيبة اسمها(Likability) .. اللي هي قدرتك علي إنك تخلي الناس يتقبلوك و يحبوك و يحبوا يوظفوك أو يعملوا بيزنس معاك. و الموضوع ده مش فطري ولا بتتولد بيه ولا لازم تبقي Baby Face عشان يتقبلوك 😀 الموضوع ده Skill بتتعلمها و تطبقها ...
17 - طب بالنسبة لل Leadership Skills ؟؟ لو حلفتلك إن دي Skill مش موهبة ولا الكلام هتصدق؟ آه و الله دي Skill .. و ممكن تتعلمها و تطبقها .. و مش شرط تبقي مدير ولا مشرف، لأن ببساطة الLeadership عبارة عن حاجتين: Likability (إن الناس يتقبلوك) و Influence (إنك تأثر فيهم إيجابيا).
و القيادة طبعا بتحتاج شيء من الذكاء العاطفي Emotional Intelligence اللي بنسميه الكاريزما،
18 - دي مش كل الSkills، ولا نصها، ولا ربعها، لازم تبحث أكتر عن الSkills اللي في مجالك و اللي تحتاجها في الكمبيوتر و اللغة و تعلي مستواك لغاية ما تقفل الأمبير .. صدقني ماحدش أحسن منك، مافيش حاجة اسمها شخص محظوظ و شخص سيء الحظ، و مفيش مجهود بيضيع .. و خليك فاكر إن ماحدش بيبتدي كبير، بس ماتضيعش دقيقة من وقتك، و خلي كل يوم يعدي عليك تكون عليت فيه في الSkills بتاعتك.
19 - الكاتب و الفيلسوف الأمريكي Earl Nightingale بيقول إنك لما تقرأ يوميا و تبحث في مجالك لمدة ساعة، في خلال 5 سنين هتبقي من الNational Experts (الخبراء القوميين) في مجالك، لأنك كده هتبقي قريت في مجالك 1825 ساعة. طب لو خليتها ساعتين؟ طب لو تلاتة؟ شوفت إنك ممكن تبقي خبير في مجالك في سنة و نص أو سنة!
20 - لما تنفذ نقطة رقم 19 و تبقي Expert فده مش كفاية، لازم ترجع لنقطة 15 و تعمل لنفسك Self-Marketing صح عشان عرف تحول الSkills دي لفلوس ..لأن حرام يبقي عندك مهارة و علم و يبقي شعرك منعكش و لابس مهلهل زي المخترعين بتوع زمان، لازم تبقي Expert و لازم تتقدر .. و زي ما فيه ناس شركات بتشغل الناس بالواسطة و الكوسة و الفساد ....في شركات كتير هتموت علي شخص مؤهل.
ابدأ طبق ده دلوقتي.
منقول بتصرف
